انا
عندى مشكلة وعارفة ان الكلام اللى هحكيه هلاقى عليه هجوم كتير بس ارجوكم
بلاش تجريح وكفايه اللى انا فيه. انا عندى 25 سنة ومن 5 سنين لما كنت ف
الجامعة ارتبطت باكتر من حد بس الموضوع كان مش بيستمر كتير يعنى واحد كان
بتاع بنات وانفصلنا وواحد تانى قالى انا مريض ومش هينفع اتجوز وكل واحد
بننفصل باسباب مختلفة بس المهم كانت العلاقة مش بتتعدى الجامعة يعنى مكنتش
بخرج مع حد . وفى يوم كنت راجعة من الجامعة وقابلت واحد فى الطريق وكان
مصمم يتعرف عليا وفضل ماشى ورايا لحد بيتى ومرضيش يسبنى غير لما ياخد رقمى
ومكدبش عليكم انا وافقت واديته الرقم وعجبنى اصراره وجنونه. المهم فضلنا
نتكلم وهو كان اكبر منى وبيشتغل شغل مناسب وانا ساعتها كنت فى تالتة جامعه
المهم قولت فى بالى هو دا الشخص المناسب اللى هيعوضنى وفعلا ارتبطنا ببعض
وبقينا نخرج بس بسيط اوى يعنى اقابله مثلا ربع ساعة قبل شغله او وهو راجع
وجالى الجامعة اكتر من مره وجت عليه ظروف وحشة وساب شغله وابتدى يدور على
شغل تانى وانا كنت بقف جنبه لدرجة انى كنت بروح معاه الانترفيو بتاع الشغل
وافضل مستنياه فالشارع عشان اطمن عليه وانا اللى كنت بدفع المواصلات عشان
هو مكنش معاه فلووس خالص وانا اللى بدفع من مصروفى كل حاااجة المهم العلاقة
بينا اتطورت ومعرفش ازاى بقيت اروحله البيت وكانت بتحصل بينا حاجات مش
كويسة خااالص على عكس تربيتى واخلاقى وكنت بعدها بكره نفسى من اللى بيحصل
بينا بس للاسف كنت بروحله تانى بسبب زنه وكلامه ليا وكان دايما يحسسنى انى
احلى واحسن واحدة فالدنيا . المهم ففضلنا عالحال دا فترة يمكن اكتر من سنة
وهو ظروفه اتحسنت واشتغل بس مجاش اتقدم ولا حاجه وكل اللى عمله انه قالى
لازم نخرج ونحتتفل بالشغل وخرجنا وركبنا مركب فالنيل وللاسف كان واخدنى
عشان يعمل اللى بنعمله فالبيت والراجل المراكبى كان شايف كل حاجة ومن
ساعتها كرهته وكرهت نفسى وقولت ان الانسان دا مش امين ولا محترم وكل اللى
عايزه منى جسمى وبس وببلاش يعنى من غير جواز وكرهت نفسى وفضلت استغفر ربنا
وقررت انهى علاقتى بيه تماما وفعلا توبت لربنا ومش كرررتها تانى ولا معاه
ولا مع غيره وقولت هركز فى دراستى وبس وفعلا اتخرجت وابتديت ادور على شغل
واشتغلت ومبقاش فى بالى غير اهلى وشغلى وطاعتى لربنا لحد ما جه اكتر من حد
يتقدملى بس مكنتش بوافق ومكنتش بحس براحة لحد ما جالى واحد حسيت ان هو دا
اللى بتمناه من الدنيا عنده دين واخلاق ومناسب وبيشتغل واهلى ماكانوش
موافقين عليه عشان معندوش شقة بس انا قولت مش مهم مدام بيشتغل يبقى هيقدر
يجيب الشقة بعد مانتخطب وفعلا اتخطبنا وبعدها صارحنى انه كان بيشرب مخدرات
بس تاب لربنا . فالاول اتصدمت وزعلت اوى بس قولت فى بالى ماهو انا بردو
مكنتش ملاك وكنت شبه بزنى بس توبت يعنى مفيهاش حاجة انى اسامحه بدال تاب .
وفعلا سامحته واحترمت صراحته بس للاسف كنت بشك فى كل حاجة بيعملها وكل
مايقولى انه خارج مع اصحابه كنت اتخانق معاه واقوله يبقى اكيد رايحين
تشربوا حاجة . وكترت المشاكل بينا بسبب شكى وقررت انفصل عنه رغم ان هو فضل
متمسك بيا لاخر لحظة ويحلفلى انه مش بيعمل حاجة غلط بس للاسف الشيطان كان
راكب دماغى وفعلا سيبته وانفصلنا . والمشكله انى بعدها حسيت بفراغ كبير فى
حياتى رغم انى مازلت بشتغل ولللاسف بدات اتصل بالشخص اللى كنت مرتبطه بيه
فالاول رغم ان موضوعه عدى عليه اكتر من 3 سنين بس اتصلت بييه ولقيته مرحب
جدا باتصالى وقالى انه اتجوز بس مش مرتاح مع مراته لاسباب مرضية عندها ومش
خلف منها وطلب يقاابلنى واتقابلنا فعلا فى كافيه وبدا يفكرنى بايام زمان
وقالى انا مراتى عند اهلها والبيت فاضى تعالى نروح هناك ونقعد براحتنا
وبغبائى رحت معاه ودخلت بيته اللى متجوز فيه وحصل بينا زى الاول واكتر
وبعدها قالى هخلص شوية شغل على الكمبيوتر وانتى خدى راحتك فالبيت عادى .
مكدبش عليكوا كنت منهارة بعدها وخصوصا لما شفت صور فرحه وصور مراته وسالت
نفسى ليه مش اتجوزنى انا وليه بييخون مراته مدام اختارها هى للجواز؟ ونزلت
من عنده ورجعت البيت وانا اعصابى منهارة وهموت من تفكيرى و اد ايه الانسان
دا مصمم يجرح فيا و اد ايه انا غبيه انى عملت فى نفسى كدا وكررت غلطى معاه .
واتصلت بيه وسالته انت ليه بتخون مراتك معايا؟ ليه عملت معايا كدا ؟ ليه
مش اتجوزتنى رغم كل اللى كان بيحصل بينا ؟ ليه سيبتنى وكل ماضيا معاك؟ قالى
دى حاجات كانت من سنين مش هينفع نتحاسب فيها دلوقت. قولتله خلاص مش هنتكلم
تانى لانك واحد متجوز وياريت تصون بيتك ومراتك وبلاش ترخصنى اكتر من كداا
وقطعت معاه فعلا . بس احساسى دلوقت زى الزفت مش حاسة بالامان ومعنديش ثقة
فى اى حد مهما كان ومش مستعدة نفسيا لاى تجربة حتى لو عدا وقت كتير بردو
هبقى دايما حاسة ان اللى معايا بيعمل حاجة غلط ومخبى وممكن فى يوم من
الايام اتجوز واحد ولما اكون عند اهلى يجيب واحدة ينام معاها على سريرى زى
ما انا عملت ونمت على سرير واحدة مالهاش ذنب. انا تعبانة اووووى بجدد وحاسة
ان الناس كلها بقت معندهاش ضمير ...
☆¸.•°*”˜˜”*°•.¸☆Banot1☆¸.•°*”˜˜”*°•.¸☆
ليست هناك تعليقات:
إرسال تعليق